Қазақ тілін үйреніп жүрген якут жігіті
(мәтін 217 сөзден тұрады)
Александр Матвеев отбасын құрған, бір баласы бар. Ол орта мектепте тарих пәнінің мұғалімі. Ол қазақ тілін үйренуді бір жыл бұрын қолға алған.
"Негізі менің есімім – Александр, қазақша – Ескендір. Қазақ тілін бір жыл бұрын өз еркіммен үйреніп бастадым. Қазақ тілі негізінен якут тіліне жақын. Ұқсас келеді. Сол себепті де қазақ тілін үйрене бастадым", - дейді Ескендір.
"Негізі қазақстандық вайнерлерді көре бастадым. Содан қызығушылық туды. Көптеген қазақ вайнеріне тіркелгенмін. Қазақ тілі өзіме жақын болды", - дейді Александр.
Ескендірдің айтуынша, қазақ елінің салт-дәстүрі мен мәдениеті ұқсас келеді. "Жалпы екі елдің тек тілі емес, сонымен қатар, мәдениеті мен менталитеті ұқсас келеді. Қазақ тілін ағылшын тіліне қарағанда жақсы білетін шығармын. Ағылшын тілін дұрыс меңгере алмадым. Одан кейін түрік, татар тілін кішкене, қазақ және орыс тілдерін білемін", - дейді.
"Якуттар үшін қазақ тілін үйрену қиын емес шығар, бірақ қазақтарға якут тілін үйрену қиындау болады. Бірақ жалпы қазақ тілін үйренуге болады. Себебі олар түркі тілдері ғой", - дейді. Тағы бізде қазақтар мен сахалардан құралған WhatsApp-та топ бар. Бірге араласып, қызық мәліметтермен, пайдалы ақпаратпен бөлісіп отырамыз. YouTube-тен орысша субтитрлері бар қазақша сериалдар көремін. Мысалы, қазір "Өмір иірімі" деген сериал көріп жүрмін", - дейді Ескендір.
Оның айтуынша, Якутияда қазақтарды кездестірмеген. Қазақ тілін практика жүзінде қазақтардың өзімен сөйлесіп, қолданып көргісі келеді екен.
"Якутск қаласында қазақтар бар ма, жоқ па білмедім. Бірақ қазақтармен кездесіп, араласып көрмеппін. Әрине, өмірде кездесіп, сөйлескім келеді", - дейді Ескендір.